ஐ.டி பெண் ஊழியரை காதலித்து பெரியோர்கள் முன்னிலையில் நிச்சயம் : திருமண நாளன்று மணமகன் ஓட்டம் : தேடி கண்டுபிடித்து கோவிலில் திருமணம் செய்து காவல் நிலையத்தில் ஆஜர்படுத்தியதால் பரபரப்பு :

பதிவு:2024-10-04 14:22:46

திருவள்ளூர் அக் 04 : ராணிப்பேட்டை மாவட்டம் நெமிலி பகுதியைச் சேர்ந்தவர் ஸ்ரீதரன். இவர் பெங்களூரில் ஐடி நிறுவனத்தில் பணிபுரிந்து வருகிறார் .இந்த நிலையில் அதே ஐடி நிறுவனத்தில் கும்பகோணம் பகுதியைச் சேர்ந்த மாற்றுச் சமூகத்தைச் சேர்ந்த அனுசியா என்பவரும் பணிபுரிந்து வந்துள்ளார். கடந்த 4ஆண்டுகளாக இருவரும் காதலித்து வந்த நிலையில் இருவீட்டார் சம்மதத்துடன் வேறு சமூகம் என்று தெரிந்தும் ஸ்ரீதரன் மற்றும் அனுசியா ஆகிய இருவருக்கும் நிச்சயதார்த்தம் செய்யப்பட்டு பத்திரிகை அடித்து கடந்த செப்டம்பர் மாதம் 15-ஆம் தேதி திருத்தணி அருகே அரக்கோணம் சாலையில் உள்ள திருமண மண்டபத்தில் திருமணம் நடைபெற இருந்தது.

இந்நிலையில் மண்டபத்திலிருந்து வரவேற்பு நிகழ்ச்சிக்கு பின் 14-ஆம் தேதி இரவு மணமகன் ஸ்ரீதரன் மாயமானார். இதனால் அதிர்ச்சி அடைந்த பெண் வீட்டார் திருத்தணி காவல் நிலையத்தில் எஸ்சி எஸ்டி பிரிவில் புகார் அளிக்கப்பட்டதை அடுத்து திருத்தணி போலீசார் மணமகன் ஸ்ரீதரன் குடும்பத்தார் ஐந்துக்கும் மேற்பட்டோர் மீது வன்கொடுமை சட்டத்தின் கீழ் வழக்கு பதிவு செய்து மணமகனை தேடி வந்தனர்.

இந்நிலையில் மணமகன் ஸ்ரீதரனை கண்டுபிடித்து பாதிக்கப்பட்ட பெண் ஐடி ஊழியரான அனுசியா திருவள்ளூர் மாவட்ட காவல் கண்காணிப்பாளர் அலுவலகம் அருகே உள்ள அம்மன் கோவிலில் இரு வீட்டாரின் நெருங்கிய உறவினர்கள் மற்றும் மணமகன் தரப்பு வழக்கறிஞர்கள் முன்னிலையில் கோவிலில் தாலி கட்டிக் கொண்டு மாவட்ட காவல் கண்காணிப்பாளர் அலுவலகத்தில் மணமகனுடன் பெண் ஆஜரானதால் பரபரப்பு ஏற்பட்டது.இதையடுத்து இருவரையும் திருவள்ளூர் அனைத்து மகளிர் காவல் நிலையத்திற்கு அனுப்பி வைத்தனர். அங்கு சமாதானமாக செல்வதாக கூறிய நிலையில் இருவீட்டார் கிளம்பி சென்றனர்.