குப்பம்மாசத்திரத்தில் உள்ள தொடக்கப்பள்ளியில் ரூ.17.32 லட்சம் மதிப்பில் கூடுதல் பள்ளிக் கட்டடம் : சட்டமன்ற உறுப்பினர் வி.ஜி.ராஜேந்திரன் திறந்து வைத்தார்

பதிவு:2022-06-14 21:12:20

திருவள்ளூர் ஜூன் 14 : திருவள்ளூர் மாவட்டம் பூண்டி ஊராட்சி ஒன்றியம், கைவண்டூர் ஊராட்சியில் உள்ள குப்பம்மாசத்திரம் கிராமத்தில் ஊராட்சி ஒன்றிய தொடக்கப்பள்ளி செயல்பட்டு வருகிறது. இப்பள்ளியில் உள்ள வகுப்பறை கட்டடம் சேதமடைந்த நிலையில் மாணவ, மாணவிகள் அமர்ந்து படிக்க வேண்டிய சூழ்நிலை இருந்தது. அதனால், கூடுதல் வகுப்பறை கட்டடம் அமைக்கவும் வலியுறுத்தி கிராம மக்கள் திருவள்ளூர் சட்டமன்ற உறுப்பினர் வி.ஜி.ராஜேந்திரனிடம் தொடர்ந்து கோரிக்கை விடுத்தனர்.

இதனையடுத்து திருவள்ளூர் சட்டமன்ற உறுப்பினர் தொகுதி மேம்பாட்டு நிதியின் மூலம் ரூ.17.32 லட்சத்தில் புதிய வகுப்பறைகள் கட்ட நிதி ஒதுக்கீடு செய்யப்பட்டது. அதன்பேரில் கூடுதல் வகுப்பறை கட்டடம் அமைக்கும் பணி நடைபெற்று தற்போது நிறைவுபெற்றது.

அதனையடுத்து கூடுதல் வகுப்பறைகள் கட்டட வளாகத்தை மாணவ, மாணவிகளின் பயன்பாட்டிற்காக தொடங்கி வைக்கும் நிகழ்ச்சி இன்று நடைபெற்றது. இந்த நிகழ்ச்சிக்கு வட்டார கல்வி அலுவலர்கள் பூவராகவமூர்த்தி தலைமை வகித்தார். கூடுதல் வட்டார கல்வி அலுவலர் ஆனி பெட்டிஷிய பொற்கொடி முன்னிலை வகித்தார். இதில் திருவள்ளூர் சட்டமன்ற உறுப்பினர் வி.ஜி.ராஜேந்திரன் தலைமை தாங்கி புதிய பள்ளி கட்டிடத்தை திறந்து வைத்து குத்துவிளக்கேற்றி தொடங்கி வைத்தார்.

அதைத் தொடர்ந்து மாணவ, மாணவிகளுக்கு மதிய உணவு,புத்தகங்கள் மற்றும் இனிப்புகளையும் அவர் வழங்கினார். இந்த நிகழ்ச்சியில் திமுக ஒன்றிய செயலாளர்கள் கிருஸ்டி என்கிற அன்பரசு,ரமேஷ்,மாவட்ட பொதுக்குழு உறுப்பினர் சிட்டிபாபு,மாவட்ட இளைஞரணி துணை அமைப்பாளர் மோதிலால்,வட்டார வளர்ச்சி அலுவலர்கள் ஹனி,பெட்ரிஷியா பொற்கொடி,தலைமை ஆசிரியர் லட்சுமி, உதவி தலைமை ஆசிரியர் தேன்மொழி, ஆசிரியர் விஜயா, ஊராட்சி தலைவர் சௌக்கார் பாண்டியன், துணைத் தலைவர் அருள் செல்வம் மற்றும் பெற்றோர்கள் கலந்து கொண்டனர்.