திருத்தணி முருகன் கோவிலில் ஆடி கிருத்திகை விழாவை முன்னிட்டு ஒரு வாரத்தில் ஒரு கோடியே 93 லட்சத்து 57 ஆயிரம் மற்றும் 544 கிராம் தங்கம், 13 ஆயிரத்து 544 கிராம் வெள்ளி ஆகியவை உண்டியல் காணிக்கை

பதிவு:2022-07-28 13:50:08

திருவள்ளூர் ஜூலை 28 : திருவள்ளூர் மாவட்டம் திருத்தணியில் உள்ள ஆறுபடை வீடுகளில் ஐந்தாம் படை வீடாக திகழும் அருள்மிகு சுப்பிரமணிய சுவாமி திருக்கோயிலுக்கு திருவள்ளூர், சென்னை, காஞ்சிபுரம், வேலூர், திருவண்ணாமலை உள்ளிட்ட தமிழகத்தின் பல்வேறு மாவட்டங்களிருந்தும், ஆந்திரா கர்நாடகா, புதுச்சேரி போன்ற பிற மாநிலங்களிருந்தும் தினந்தோறும் ஆயிரக்கணக்கான பக்தர்கள் வருகை தந்து முருகனை தரிசித்துவிட்டு செல்வதுண்டு. இந்நிலையில் கடந்த 21-ந் தேதி முதல் 25-ந் தேதி வரை ஆடி கிருத்திகை விழா மற்றும் தெப்பத் திருவிழா கொண்டாடப்பட்டது. இதனால் காவடி எடுத்து வந்தும், அலகு குத்தியும் பக்தர்கள் அனைவரும் மலைக்கோயிலில் மூலவர் முருகப்பெருமானை தரிசனம் செய்துவிட்டு காணிக்கையாக உண்டியலில் பணம், நகை, ஆகியவற்றை செலுத்தி உள்ளனர். பக்தர்கள் காணிக்கையாகச் செலுத்தப்படும் உண்டியல் பணம், இதேபோல் திருத்தணிமுருகன் கோயில் உடன் இணைந்த 30 உப கோவில்கள் உண்டியல் பணம் அனைத்தையும் எண்ணுவதற்கு தமிழக இந்து அறநிலையத்துறை ஆணையர் அவர்களிடம் அனுமதி பெற்று திருத்தணி முருகன் கோவில் நிர்வாகம் மலைக்கோயிலில் தேவர் மண்டபத்தில் கோவில் துணை ஆணையர், செயல் அலுவலர் விஜயா, கோயில் தக்கார் ஜெயப்பிரியா ஆகியோர் முன்னிலையில் திருக்கோயில் பணியாளர்களைக் கொண்டு உண்டியல் காணிக்கை எண்ணும் பணி இரண்டு நாட்களாக நடைபெற்றது. இதில் கடந்த ஒரு வாரத்தில் மட்டும் உண்டியல் காணிக்கை மூலம் ரூ.1 கோடியே 93 லட்சத்து 57 ஆயிரம் ரூபாய், தங்கம் 544 கிராமும், வெள்ளி 13 ஆயிரத்து 544 கிராமும் காணிக்கையாக செலுத்தியிருப்பதாக கோவில் நிர்வாகம் சார்பில் தெரிவிக்கப்பட்டுள்ளது.